E lē o iai se fuafuaga i tapenaga o le Fono a Malo o le Taupulega, e iai se avanoa faapitoa e feiloai ai ta’ita’i o malo o le a malaga mai atunuu e 56, ma pulega a nuu ma afioaga o le atunuu lea ua ave iai atunuu ta’itasi e autū iai a latou tapenaga o le faamatagofieina o aai ma faoāaai.
Na faailoa lea tulaga i se finagalo o le ta’ita’i o le Malo ina ua fesiligia e tusitala, ina ua faia ai mo le taimi muamua sana faalauiloa lautele e ala i sana saunoaga i le atunuu, e faailoa ai vaega ua oo iai tapenaga a le Malo o Samoa mo lea fono tele faavaomalo i le masina fou.
O tapenaga i le malaga taualoa mai i Samoa a le Tupu o Peletania ma lana Masiofo, ua faailoa e le Palemia le afioga Fiame Dr Naomi Mataafa o le a faamautū i se taimi lata mai, ae o se tasi o ia polokalame o le ‘ava faatupu, faapea se asiasiga i se nofoaga o togalaau i se tasi o afioaga i le itumalo o Falealili.
