O le amataga o lenei vaiaso na tuua ai lo tatou atunuu e le afioga i le Ao Mamalu o le Malo ma lana Masiofo, i le faamoemoe e auai i le faauuga a le Iunivesite a le Pasefika i Saute e faia i le Aso Tofi ma le Aso Faraile o le vaiaso nei.
O le mafuaaga ona o le Ao Mamalu o le Malo, le afioga Tuimalealiifano Vaaletoa Sualauvi II, o le faa-Ao o le Iunivesite, e pei ona sa faaee iai lea tofiga i le faauuga na faia i Samoa i se masina e lei mamao atu.
O loo malaga faatasi o ia ma le Ofisa Sili o le Pulega o le Matagaluega a le Palemia ma le Kapeneta le tofa Agafili Tomaimano Shem Leo.
E lei leva ona taliu mai i le atunuu le lato i le ea ma le opea i le ala, o le Ao Mamalu o le Malo ma lana Masiofo, sa auai i toe sauniga o lē sa avea ma Tupu o le Malo tele o Peretania o le faa-Ao foi o Malo o le Taupulega.
