O se taeao uiga ese lenei aso i le malae o Tiafau i Mulinuu i le tumutumu atu o Faipule a le Faatuatua I le Atua Samoa ua Tasi i fafo ane o le falefono ona o loo tapunia nei faitotoa o le Palemene o Samoa.
E pei ona silafia o le itula i le 9:30 taeao nei (taimi samoa) lea na fuafua e faia ai le sauniga aloaia e faatauto ai sui a faipule e toa 51 lea na faamanuiaina mai le faigapalota a Samoa i le Aso 9 Aperila 2021.
Peitai o le taeao nei e te’a ifo lava le itula e 10 o loo tapunia pea faitotoa o le falefono.
Na faafeao mai foi e le Matagaluega o Leoleo le afioga i le Faamasino Sili ma le vasega a faamasino e agai i le falefono mo le faamoemoe peitai e lei mafai ona agai i totonu ona o lea faafitauli i le tapunia ai o faitotoa.
O le agai ai o le FAST i le taeao nei i le maota fono ona o loo usitaia pea faaiuga a le faamasinoga i le faaleaogaina ai o le tele o poloaiga na tuuina atu e le Ao o le Malo e taofia ai le Palemene mai lona tauaofiaga i le taeao nei, ae le gata i lea o le taeao nei lea e atoa iai le 45 aso talu ona maea le faigapalota tele a le atunuu.
