O le 13 ai nei o tausaga talu ona faatino le Faaaliga tele o Tu ma Aganuu o atunuu o motu o le Pasefika o loo faatautaia i le motu o Hawaii.  

I le tatalaga aloaia na iloga ai le tu matila o taumafaiga aemaise o le folasaga a le afioga i le Pule Sili o le Matagaluega o Aoga ma Aganuu i Samoa (MESC) A’e’au Chris Hazelman i le faalauiloaina o Samoa aemaise o le sootaga o atumotu taitasi o le Pasefika.  

Na faailoa e le afioga ia A’e’au le tulaga maualuga o le faatasiga ma le avanoa e auai ai Samoa i lenei faatasiga tāua.

A o lei oo lava i le faaaliga na molimoli e le Pule Sili le faafetai a Samoa i le Kovana Sili o Hawaii ia Josh Green e tusa ai ma lona agalelei ia Samoa, i le taimi o fita ma faigata i le sasao o le faama’i o le misela i le tausaga 2019. 

Sa ia sa’afi foi i se tasi o tamafanau o Samoa, lē sa avea ma pulenuu o Honolulu le afioga ia Mufi Hannemann ma ia faamamafa ai le saunoaga a lea foi tamalii.

Sa faaiu le saunoaga a le afioga ia A’e’au Chris Hazelman i le faailo foi o se tasi o tamalii Samoa ua iloga foi lona sao i Hawaii i le tele o tausaga ia Aaron Salā. 

E 27 atunuu e aofia ma Samoa o loo tausinio i le Faaaliga o Tu ma Aganuu o le Pasefika i Hawaii ma e 10 aso o loo faatino ai lea faamoemoe i lona autu “Regenerating Oceania”.

O le tausaga 2020 sa tuu e talimalo ai Hawai’i i lenei faaaliga peitai ona o tulaga o vavao ma tapu o le faama’i o le Koviti-19 na taofia ai le tele o faamoemoega.