Ua mae’a ona folafola e lē sa avea ma Palemia o Ausetalia i se taimi e lei mamao atu, Scott Morrison lona malolo litaea mai le polokiki i le faaiuga o Fepuari o le tausaga nei.
I sana faamatalaga ua faia i luga o le Facebook sa faailoa ai e Morrison ua ia faia le faaiuga ina ia faatino nisi o luitau fou i le corporate sector ma faaaogā foi le taimi e mafuta ai ma lona aiga.
Na ia faailoa foi o se faaaloalo maualuga lona taimi sa iai i le polokiki.
Na ia ta’ua lona faafetai i lona aiga, uo ma le komiuniti i le lagolago aemaise lona faaitu o Cook ma o se faaaloalo maualuga foi mo ia le auauna ai o le sui o lea faaitu ma le Palemia o Ausetalia.
O le 2007 na muai filifilia ai Morrison i le Palemene ma avea ai ma minisita o Femalagaa’iga i le 2013 a o Palemia Tony Abbott.
Sa avea ma teutupe ina ua sui tulaga Malcolm Turnbull ia Abbott ma avea ai loa ma Palemia ina ua fulisia iai palota a lana vaega faaupufai le Liberal i le palota o le 2019.
