O le asō, e faamae’aina ai taualumaga uma o fonotaga a ta’ita’i o Malo o le Taupulega ma ua toe filifilia ai se tamaitai e tula’i mai i le foe o le Failautusi Aoao o Malo o le Taupulega poo le Secretary-General e pei ona sa seei mai ai le tamaitai o Patricia Scotland i le lua ai o ana nofoa’iga i lea tulaga maualuga.
O le aoauli nei na faailoa mai ai lenei suiga.
O le tamaitai o Shirley Ayorkor Botchwey ua filifilia nei i le mae’a ai o se faigapalota o ta’ita’i na auai i lea fonotaga, ae o se faatasiga poo se retreat sa faia lea i le faletalimalo o le Sheraton Resort i Mulifanua.
O le sui lona 7 lea ua avea ma Failautusi Aoao o Malo o le Taupulega.
O le tamaitai ia Shirley o le Minisita o le Va i Fafo ma Faalapotopotoga o le Itulagi (Foreign Affairs and Regional Integration) a le malo o Ghana, o se tulaga tofi na seei mai ai i le tausaga e 2017 seia paia le taimi nei.
Ma ua tele faalapotopotoga ma auaunaga ua aofia ai lea minisita mo le tele o tausaga i le avea ai o ia ma sui o le Palemene o le atunuu o Ghana.
