E telē le aafiaga e ono oo iai le Aukilani Samoa pe a oo ina aumai se tala mai le iuni lakapi a Aukilani faapea le asosi a laufalī a Aukilani ma faapea mai e lē toe aumaia ni laufalī e faafoeina taaloga a le iuni a le Aukilani Samoa.
O lea aafiaga tele e ono faamuta ai loa ma le toe faaauauina o le iuni a le Aukilani Samoa ona o le a lē toe iai ni laufalī e faafoeina taaloga.
Ma o le popolega tele lena o loo nofo faatalitali nei iai le iuni lakapi a le Aukilani Samoa a o tau fofō ai le faafitauli na tula’i mai i le faai’uga o le vaiaso.
O le taaloga o le talita i le va o le ‘au a le Liona mai Laulii ma le United lea sa tupu ai le vevesi i totonu o le taaloga ina ua faaoolima le numela iva o le ‘au a Laulii i le laufalī sa faafoeina le taaloga.
O se gaioiga matagā ma lē talafeagai i le maimoa a le atunuu i lea aso a o tapua’i i le taaloga mulimuli o le talita.
Ae sili ai o se tu ma se aga lē manuia o le laufali palagi sa faatautaia le taaloga.
O loo tapena e le laufalī sa faia le taaloga lana lipoti i le mea sa tupu ma tuuina atu i totonu o le iuni lakapi a Aukilani, ma o loo faatali nei iai le iuni a le Aukilani Samoa.
Pe sau le faai’uga e faamālōlō le numela iva a Laulii e lē toe taalo i le olaga atoa o le i’uga lava lena e fai iai.
Ae a faapea e tuuina mai e le iuni a Aukilani i le Aukilani Samoa o latou e faia le faai’uga, o lona uiga e talanoa loa lea o le komiti a le Aukilani Samoa ma fai loa se faai’uga talafeagai i le faalavelave na tula’i mai i le Aso Toonai.
O le saunoaga lea a le susuga i le Peresetene o le Aukilani Samoa le afioga ia Fepuleai Cochise.
O le toe teuteuina o le vevesi sa tula’i mai i le Aso Toonai i le va o Laulii ma le United, na faatoese ai se tasi o tamā matua o le afioaga o Laulii i le Komiti Faafoe e tusa ai ma le mea sa tupu.
Ae na avatu ai foi ma le tuualalo a lea tamā, e faamolemole o le ā se faai’uga e fai, ia pa’ū lava le samala i le ulu o le fao.
Ia faasala lava na o le tagata lea sa faia le vevesi ae aua ne’i aafia ai le ‘au atoa a Laulii.
Ma o loo taoto nei le mataupu i se tali mai a le iuni a Aukilani ma le asosi a laufalī.
