Faaletonu le vaalele a le ami na tuu e momoli ai le alii Palemia,Christopher Luxon ma le vaega ‘au i Iapani, ma o lea na pu’e ai le isi vaa e faaauau ai lana faigamalaga.
O le faalua ai lea ona aafia faigamalaga a le Palemia o Niu Sila i lenei tausaga ona o le faaletonu o vaa a le ami, ma i’u ai ina toe totogi le pasese e malaga faatasi ai ma tagata lautele.
Ao iai i Papua Niu Kini ananafi le palemia ma le vaega ‘au na faate’ia i le sau o le tala ua faalua ona pa le fuse o le Boeing 757.
Na suia ai loa tonu ma pu’e le isi vaa e malaga ai Luxon ma nisi o le vaega ‘au poo le ami a Niu Sila e ui atu i Hong Kong.
Ae mo le isi vaega o le aumalaga lea o loo o iai le silia ma le 30 sui mai kamupani eseese i Niu Sila, o lea na malolo ai anapo i Papua Niu Kini, e tālia le aso e faaauau ai agai i Ausetalia lea o loo faatali mai ai le vaa a le Ea Niu Sila e momolia agai i Tokyo.
Ae i saunoaga a le minisita o fefaatauaiga Todd McClay lea foi o loo alu i le aumalaga, o le faanatinati ai o tonu e malaga le palemia anapo i le isi vaalele lea o loo feaveaia tagata lautele, ua faia lea ina ia mautinoa e maua ana fonotaga ua maea faatulaga i Iapani.
Puna o Faamatalaga: https://www.1news.co.nz/2024/06/16/luxon-to-fly-commercially-to-japan-after-nzdf-plane-issue/
