Ua manumalo nei le finauga a le vaega faaupufai a le Faatuatua i le Atua Samoa ua Tasi le FAST e faaleaogaina ai le nofoa faaopopo o tamaitai o le Palemene lea na sainia ai e le Ao o le Malo se tusi filifilia e tofia ai le sui o Alataua i Sisifo Aliimalemanu Momoemausu Moti Alofa Tuuau e fai ma sui faaopopo o tamaitai i le Palemene.
O lenei faaiuga na autasi uma iai afioga i faamasino e toatolu lea na nafa ma le iloiloina o le mataupu.
O se taimi o i luma tuuina mai tusitusiga o mafuaaga na autasi ai faamasino ina ia faaleaogaina lenei nofoa faaopoopo ae o le taimi nei o loo vaaia le pepese fiafia a sui o loo lagolagoina le FAST i fafo ane o le Fale faamasino ina ua manuia le latou finauga.
O lona uiga o loo tumau le fainumera o sui a le FAST i le to’a 26 ae ua 25 sui o le HRPP.
Lea ua maea le isi mataupu ae o loo tālia pea le isi mataupu taua faasaga i le Malelega a le Ao o le Malo i le itula e 3 (taimi samoa).
