Ua faailoa e le pulega o le Lakapi Samoa lana tapenaga mo le faailogaina o le 100 tausaga o le taaloga lakapi i Samoa, lea e amata i le sauniga lotu i le Aso Sa o muamua nei le aso 25 o Aokuso, lea o le a faataunuu i le malumalu o le Ekalesia Katoliko i le afioaga o Lepea.
O le Aso Lua, 27 o Aokuso le savali o le a auai le toatele o tamalii sa solisoli tapoleni i le auai i le taaloga lakapi i tausaga ua mavae ma o nisi o le a malaga mai fafo.
O loo faapolokalame foi se tasi o sauniga o le tufatufaina o faailoga taualoa mo le toatele ua iloga lo latou sao i le taaloga poo le capping awards o le a faia i le Aso Lulu 28 o Aokuso i le malae o le Friendship Park e pei ona faailoa ai e le Ofisa Sili o le Lakapi Samoa i se lipoti a le leitio a Niu Sila.
Ae i le taamilosaga o le Ipu o le Pasefika o le a tala malae ai i le faai’uga o lenei vaiaso le taaloga a le aulakapi malosi a Fiti le Flying Fijians ma le Manu Samoa, o le faalima sefuluono lea ona tatou taaalo ma Fiti e tusa ai o faamaumauga.
O le tausaga e 1924 na uluai taaalo ai Samoa, Tonga ma Fiti i ni taaloga faitaulia poo test matches i le lakapi ma ua atoa ai nei le selau tausaga.
Ua faaalia i se lipoti o le tausaga e 1884 na muamua faia ai le taaloga lenei i eleele o Fiti, ae o le tausaga e 1924 na faato’ā taaalo ai se aulakapi a lea atunuu ma aulakapi a Tonga ma Samoa i ni taaloga faitaulia faavaomalo.
