Na asia e le pulega o le Manu Samoa taitoafitu pisinisi tuma’oti i Samoa i le vaiaso na tea nei e faaali lo latou agaga faafetai mo le lagolago faaauau i le ‘au a le atunuu a o iai i taamilosaga tetele. 

I ripoti a le Samoa Global na faailoa ai o le kamupani a le Samoa Stationery and Books na taulimaina e le pulega le afioga Tofilau Fiti Leung Wai ma le afioga Tuatagaloa Aumua Leung Wai se meaalofa faatauvaa a le Manu Samoa taitoafitu e faafetaia ai le lagolago a lenei kamupani i soo se fuafuaga a le ‘au. 

Na faaalia e Tofilau ma le Pulega a le SSAB le loto faafetai i le amanaia foi o i latou e le ‘au a le Manu Samoa Taitoafitu. 

O nisi kamupani a le atunuu na faafetaia ma asia e le Manu Samoa 7s e aofia ai le kamupani a le Siva Afi Samoa ma le Auto Parts. 

O le taimi nei ua toe foi le ‘au a le atunuu i tapenaga ma toleniga mo le isi taamilosaga fou faapea taaloga a le Oceania 7s.