O le taeao nei (taimi Samoa) lea na faailoa mai ai e le sui tauva o le Faatuatua i Le Atua Samoa ua Tasi le susuga Papalii Tavita Moala laasaga o le a oo iai le mataupu ma le sui filifilia mo Sagaga No.1 Loau Solamalemalo Keneti Sio o le sui a le HRPP.

O lea mataupu na faaalia e Papalii o le a faaauau lava i le faamasinoga ona e le’i autasi o la manatu i vaega na tuu mai e le faamasinoga e soalaupule ai le la mataupu.

1.  Faamavae uma e le toe o i le faigapalota laititi
2.  A lē maua se tonu ona agai loa lea i le faamasinoga

E 10 minute na tuu atu e le faamasinoga e soalaupule ai le mataupu a sui nei e lua ma na taua e Papalii o lona manatu na tuuina atu ia Loau ina ia la nonofo loa aua nei toe alu se isi i le faigapalota laititi ae saili se isi tamaalii. Peitai na tatalo atu Loau i le mafai lea ona tuu atu le avanoa ia te ia e tauave ai le tofi mo le itumalo.

I le maea ai o feutagaiga a vaega uma e lua e le’i autasi ai i se manatu e tasi lea la ua iai le talitonuga o Papalii o le a faaauau loa le mataupu i luma o le faamasinoga.

Ua manino le mamalu o le atunuu i le maliega muamua na tuuina mai e sui o lea itumalo, ina ia faamavae Loau ma le tofi faipule lea na filifilia ai i le faigapalota i le Aso 9 o Aperila ae toe foi Sagaga No.1 e fai le palota laititi ma e lē toe tauva le sui na tagi le susuga ia Papalii i lea faigapalota. Peitai e ese le tulaga lea ua iai ua toe manatu Papalii e tatau ona faaauau pea i le faamasinoga.

Ina ua fesiligia e tusitala Papalii pe aisea ua manatu ai e faaauau pea le tagi ae o lea e lē iai sona mafaufau e toe alu ai i le palota laititi, tali Papalii

“E iai le ma maliega i tua atu o le mea lea, a faapea e toe ave le avanoa e alu ai Loau i le faigapalota laititi ona sau lea i le FAST, lea ua o’u tau atu le mataupu lea, na talosaga mai Loau i le faatoa uma a o le call muamua e faamolemole e aua nei faailoa o ia lea o le a sau i le FAST, peitai lea faatoa toe ma feiloai a lea ma Loau, o lea la e lē suia lo’u mafaufau ma e lē ave ai tua la’u tagi ma e manaia foi le o e saili le amitonu i le faamasinoga poo fea o iai”.