Na faailoa o le faamatuu atu o nonoga tupe o loo i le malosiaga o le Board ma le pulega a le SNPF lea tulaga, na pau le tulaga o loo vaaia i faitioga o loo tuuina atu pe sa savalivalia faiga faavae ma taiala o le faamatuu atu o aitalafu aemaise i nonogatupe tetele mo pisinisi.

O le saunoaga lea a le alii minisita o Tupe ia Lautimuia Afoa Uelese Vaai i le faatalanoaga ma tusitala ananafi ona o mataupu e faatatau i le NPF.

Ua matuā lagalagā finagalo o le ‘au faisaofaga ina ua faasalalau e le nusipepa o le Samoa Observer le tusa ma le 67 miliona tala o tupe ua faamatuu atu mo nonogatupe a ni pisinisi se ono i le atunuu i totonu o le 9 masina.

Ua alia’e ai ma ni faitioga ua oo atu i le Kapeneta e faatatau lava i lenei mataupu.

O se tulaga ua fesiligia ai le faaiuga a le Board aemaise i le taitaifono le Susuga Papalii Panoa Tavita Moala sa faataga ai le tuu atu o nonogatupe nei i pisinisi ae o loo faafaigata mo le tele o tagata faisaofaga pe a oo atu e nonō i la latou faaputugatupe.

Na faailoa e le alii minisita e lē fou le tulaga o le faia ai e le Board ma le pulega o faaiuga i nonogatupe sa faia foi lea tulaga i faigamalo ua tuanai.

O faafitauli foi ua tutupu nei e lē faatoa tupu foi lea, o le faamatuu foi o nonogatupe na ia faailoa e iai faiga faavae ma tulafono ma taiala e faia ai ma e tatau ona faamalieina ia tulaga uma.

Na faailoa e Lautimuia e lē o iai se faiga faapolokiki o iai i le faaiuga na faia e ui o le taitaifono sa tamoe i le faigapalota o se sui tauva o le FAST ua tulai mai nei ma faigamalo.

O le ala foi lea o le faia e faigamalo ua tuanai o nei faiga faavae ia mautinoa aua lava ne’i aafia ai le polokiki.

Ua faaalia manino e le alii minisita o le natura lava lea o le galuega a le SNPF e faamatuu atu tupe ina ia faafaigaluegaina e toe maua mai ai se faasiliga, ma o loo i le pulega ma le Fono Faatonu le malosiaga i lalo o le tulafono a le SNPF e faia ai lea tulaga.

Ua tuuina mai ai foi ma le finagalo o le alii minisita i le vaavaai pea i le tulai mai o lea faafitauli ua tatau ai i le malo pe a talafeagai ona toe tilotilo i le tulafono a le SNPF, o ana tulafono faatonutonu ma faiga faavae pe lē ua alagatatau ona toe faia iai ni suiga.

Ua faailoa foi e le alii minisita i le tulaga o le mataupu lea i le iloiloga o le faamatuu atu o nonoga tupe e le aiāina e le minisita.

E ui i tulaga na lāgā ae o le tala fiafia o loo saogalemu saofaga a le atunuu ma o loo sologa lelei tulaga uma e pei ona saunoa mai le alii minisita.