A itiiti mai e to’alima ni aiga ua aveesea, o isi sa latou nofoia, a o nisi sa latou faato’a ni vaega o eleele o le malo o loo i le vaaiga a le faalapotopotoga o le Esetete Tausi.
O ia fanua e tusa ma le 300 eka lona telē o loo faafesaga’i ma le malaevaalele i Faleolo.
I se feiloa’iga i le tamaitai pule o le Esetete Tausi o Natasha Kolose na ia faailoa ai, sa ave tusi i ia aiga ma faailoa iai e solomuli ese ma le filemu ona ua latou solia eleele o le malo i se auala faamalosi ma solitulafono.
O nisi o aiga sa fau ai fale faafaasee ma latou faamamā ma totō i laau tau faato’aga le fanua, peitai o le tala mai a Natasha ua lē o toe vaaia ai nei ia aiga.
Ua faailoa e le tamaitai pule o le Esetete Tausi na amata ona aga’i atu ia tagata ma nofoia ma faaaogā faasolitulafono ia eleele, ina ua faailoa e le malo le faasee uma o mataupu tau fanua o le Malo i le matagaluega fou o eleele ma fuagafanua.
O ia aiga o loo nonofo i le tuaoi o ia fanua o le malo ma fanua o le afioaga o Satapuala.
O le tausaga e 2011 na tula’i mai se feteena’iga i le va o le Malo ma le nuu o Satapuala ona o se vaega o ia eleele.
O le toe taumafai o nisi aiga e nofoia ma faaaogā ia fanua ua tāpā ai e le Esetete Tausi le fesoasoani a le matagaluega o leoleo, falepuipui ma le toe fuata’ina.
E ui ua mae’a ona faalauiloa le tuufaatasia o eleele uma o le malo i le matagaluega o eleele ma fuagafanua, peitai o loo faagasolo pea tapenaga mo le tuuina atu i le Palemene o se tulafono e aloa’ia ai lea laasaga.
