O se tasi o filifiliga ua faamautū i se faai’uga a le Kapeneta i le vaiaso nei, o le faauluuluga poo le Ofisa Sili o le tasi o Matagaluega fou ua faaigoaina o le Matagaluega o Eleele ma Fuagafanua, lea ua tagofia uma ai mataupu tau eleele o le malo.
O le tofa Ulugia Petelo Kavesi sa avea ma faauluuluga o le faalapotopotoga o eleele a Samoa, o se faalapotopotoga tuma’oti a le malo ua tuufaatasi ma le matagaluega fou o eleele ma fuagafanua, ma ua avea ai lea tamalii ma faauluuluga poo se tasi o Ofisa Sili.
Tele nisi o matagaluega ma auaunaga a le Malo sa tautua ai Ulugia i tausaga ua mavae, a o lei filifilia e avea ma Pule o le faalapotopotoga o eleele a le atunuu le Samoa Land Corporation, lea ua le toe iai ae fafao uma galuega tau fanua o le malo i le matagaluega ua iai nei.
O le vaega o eleele ma fuagafanua sa i le Matagaluega o Puna’oa Faalenatura ma Siosiomaga, faapea eleele o le faalapotopotoga o le Esetete Tausi ua i lalo uma o le matagaluega fou o eleele ma fuagafanua.
