O le lē auai o tagata Aukilani i Saute i le tusigaigoa o le 2018, ua ono avea lea ma mafuaaga o le faaitiitia o tupe e tuuina mai e faatupe ai auaunaga tau i le soifua maloloina.
E $130 miliona tupe lē maua e le Counties Manukau District Health Board i totonu o le fā tausaga talu ai e mafua i le maualalo o le fuainumera o tagata e nonofo i lea vaega o Aukilani na faatumuina pepa o le tusigaigoa o le 2018.
O le tala lea mai le pulega a le soifua maloloina ma ua fai mai ai ma se tasi o tagata suesue faapitoa o se vaegatupe semanu e aogā mo le faaitiitia o le tino puta ma le ma’i suka.
I faamaumauga o Counties Manukau o loo toatele ai tagata e maua i le ma’i suka pe a faatusa i isi nuu o Niu Sila pei ona iai le 52,000 ma o lea lava e faatupulaia i le 2,000 tagata i tausaga taitasi.
Ae i le tusigaigoa o lenei tausaga mai le vaega o faamaumauga o lea e na o le 71% tagata o loo nonofo i Aukilani i Saute ua mae’a ona faatumu pepa o le tusigaigoa.
Ua fai mai ai ma le soifua maloloina e tāua tele le tali o fesili o le tusigaigoa ona o i e fua iai le faasoa a le malo aemaise auaunaga tau le soifua maloloina ma ona manaoga.
