Ua aga atu le atunuu e molimauina polokalame ua tapena e le malo e faamanatu ai le 64 tausaga o le tuto’atasi i le masina fou, ma ua talafeagai tonu ma le toe faamamalu o tulafono o le vavao a le afio’aga o Apia, o loo avea ma tō’aiga o le atunuu ona o le tatou taulaga o loo iai.
E lē gata ina fetaui le toe faia o le vavao a le nuu ma le 3 aso o sauniga eseese o le Sisigafu’a ia Iuni, ae o le faagasologa o polokalame e tapuvae tasi i le taulaga o Apia ma tumutumu iai le atunuu i le ao faapea le po.
Ua faailoa e le pule mamalu a alii ma faipule o Apia i sana faasalalauga o lana vavao ua toe faamamalu, ona ua molimauina le faatupula’ia o amioga lē mafaufau i le faapisapisaō o leo o laaupese a taavale ma tagata feoa’i i taimi o faigālotu, ae faaopoopo iai ma uiga lē migao i taimi o le tuneva o le po i tafaoga ma evaga i luga o le taligalu o loo si’omia ai lumāmaota o le nuu aemaise o le faataamilosaga o le alatele autū i le taulaga i Apia.
Ua ta’ua le faailoa e alii ma faipule o le latou vavao o le a toe faia mo le silafia e le atunuu fegasoloa’i aemaise o pisinisi tau faleoloa o loo tatala i taimi o le po ma afea mo faatauga o le ‘avamalosi.
Ua faailoa i le faasalalauga o le ‘afa o le ono i le afiafi e oo i le fitu o le vavao mo faigālotu, ma le logo o le a ta leotele i le ta o le 11 i le po e faailoa ai le vavao ua tofafā le nuu ma e faato’ā mae’a i le 4 i le vaveao.
O le taimi tonu lea ua amata aga’i le atunuu i galuega e amata vave faapea a’oga a le fanau e usupo mai ai pasi ma taavale mai nuu ma afio’aga i tua mo le taulaga i Apia.
O se masina e le’i mamao atu na faailoa ai foi le toe faia o le vavao a se tasi o nuu i le taulaga le afio’aga o Vaiala e māfua lava i le nofoaga o loo iai le matāfaga ma le taligalu o loo lumāfale iai lea nuu ua tele ai evaga ma le faapisapisaō o tagata feoa’i aemaise le au tafafao i taimi o le afiafi e oo i le po.
