O le amataga o lenei vaiaso i lona Aso Gafua na oo mai ai le faai’uga o le faamasinoga e tusa ai ma le matāupu a le alii o Hayden Tasker, ua 33 tausaga o le matua.
Ma o lea ua faamaonia ai moliaga o Hayden e le Faamasinoga Maualuga i Kalaiesitete i le fasioti tagata faamoemoeina poo le murder, i le maliu ai o le tama’ita’i leoleo Satini Sinia ia Lyn Fleming, faapea le faamaonia o lona faaoolima tugā i le alii leoleo o se Satini Sinia foi o Adam Ramsay.
E tusa ai ma faamaumauga na folasia i le faamasinoga, o Fleming ma Ramsay sa faatino sa la’ua petolō, sa o la savalia le aai i le po o fiafiaga o le faamanatuina o le Tausaga Fou, poo le 9 minute e te’a ai le 2 i le vaveao na faafuase’i ai ona soso’a la’ua e se taavale lanu pa’epa’e i lona ituaiga o le (Honda Odyssey). Faamauina le matua’i aafia tele o ia malu o le malo.
Ta’ua i ripoti mai le leitio faavaomalo, e faitau mita le mamao na taia ma oo iai le alii o Ramsay, ae māua le tugā o aafiaga ma manu’aga o le tama’ita’i leoleo o Lyn Fleming, e pei ona faailoa na maliu o ia i se taimi mulimuli ane i le falema’i.
Na finauina e le Crown le mau, sa faia lava ma le mautinoa, ma faia lava ma le loto iai e le alii o Hayden Tasker ia gaioiga.
Sa ia faaaogāina se taavale o se ‘au’upega e faaoo ai lona ita ma lona ma’ema’eā i leoleo, o lea na ia soso’a ai ia malu o malo.
Ae peita’i na tetee ma finau le loia o loo tula’i mo Hayden, e lē o se mea na mafaufauina, e leai sona manatu e na te faaoo se oti i se leoleo, talu ai o Hayden sa feagai ma ona mafatiaga i lena taimi, sa iai ni ona aafiaga faalemafauafau.
Faaalia sa ia taumafai e faaoo le oti ia te ia lava ae lē o le taumafai e faaoo le oti i se leoleo, ma sa faamauina le faasuā’avā o Hayden i le taimi na alia’e mai ai lenei faalavelave.
O lea na finauina e lana loia e tatau ona molia ma faamaonia i le fasioti tagata pa’ivalea (manslaughter) peita’i e le’i talia e i latou na nafa ma le iloiloina o lenei matāupu ae faamaonia o ia i le fasioti tagata faamoemoeina.
Na faamautūina foi i totonu o le faamasinoga e fai lava sina malosi o le inu ‘ava malosi o le alii o Hayden ma ua tele taimi ua maua ai lona ‘onā tele, maualuga atu nai lo do le vaega faatulagaina (legal alcohol limit), ma e faamauina le tele o mau e tauala mai i atapu’e o telefoni faapea CCTV footages na maua ma molimau o tagata na iai i le taimi na tupu ai lenei faalavelave.
Faailoa e le alii Komesina o Leoleo, Richard Chambers, e lē mafai ona aveese mafaufau ma loto i le maliu o le tama’ita’i o Lyn Fleming, ma ia faamatala o lea lava na maliu lenei malu o le malo i le faia ai o lana galuega ma lona tautuaina o le atunuu.
Faaopoopo le Ta’ita’i Leoleo Tasman District Commander Superintendent Tracey Thompson, o se faai’uga sa’o, ma o se taunuuga ua maua ai se mafanafana, ae o le a lē faagaloina tigā ma le faanoanoaga a o aafiaga ua fetaia’i ma leoleo, o tagata na aafia aemaise o le aiga o le tama’ita’i o Lyn Fleming.
O le tama’ita’i Satini Sinia ia Lyn Fleming ua to’a 34 iai malu o malo ua maliliu a o iai i luga o tiute faaleoleo (line of duty) ae o ia o se ulua’i tama’ita’i leoleo ua maliu a o iai i luga o tiute i le tautuaina o le atunuu.
A o le’i maliu Lyn, ua 38 tausaga ma le 7 masina o tautua i le Auaunaga o Leoleo.
Puna o Faamatalaga: https://www.rnz.co.nz/news/crime-and-justice/595563/hayden-tasker-found-guilty-of-murdering-senior-sergeant-lyn-fleming
