Ua amata tuli le faasalaga faafalepuipui e ono tausaga o se tama 47 tausaga o lona matua, ina ua faamaonia ona moliaga o le faia o se fesootaiga faaulugalii ma se teineititi 12 tausaga le matua, ma iu ai ina ma’itaga lē na aafia ma ola ai i se masaga tama.

O le teineititi na faia iai le solitulafono o le tama teine a le tina i le isi ona toalua, ae na faatino le gaioiga e lē ua molia amata ia Me o le tausaga 2021 e oo ia Oketopa o le tausaga na sosoo ai 2022.

Na faatoa iloa le faaletonu ua tupu i le teineititi ina ua iloa e lona faiaoga ua ma’itaga, ma logo ai loa leoleo ma faia le suesuega ma ioe ai lē ua faasalaina.

O le tamā ua tuli lona faasalaga faafalepuipui e toafitu lana fanau i le isi ona toalua.

O se tasi o mataupu tau faamasinoga na aafia ai se teineititi 15 tausaga le matua o se afafine o se tasi o le fanau a se tamā ua 69 tausaga o le soifua, ua nofosala ai lea tamā matua i le 15 masina i le falepuipui.

Na ioe lē ua nofosala i moliaga o lona faia o ni uiga matagā i lē na aafia, ae o le tamā 47 tausaga ua falepuipui i le ono tausaga na ioe i moliaga uma a leoleo, i le aso na faatulaga o le a valaau ai molimau. 

I le faamasinoga maualuga lava a le atunuu e 3 masina ua faafalepuipui ai se tamaitai 23 tausaga le matua, ina ua faamaonia lona ioeina o moliaga o lona toesea o ni seleni a le Western Union ma le Falemeli a Samoa a o galue i le lala o le falemeli poo le Postal i Tuasivi i Savaii.

O le lālā lea o le falemeli i Savaii e le gata sa faatau ai faailogatusi ma taulimaina ai foi meli e lafo i fafo, ae sa iai ma le auaunaga a le Western Union mo le talaina o tupe faamomoli mai fafo.

E 3,915 se seleni a lea kamupani na aafia i le solitulafono ae $5,873 le tupe a le falemeli na toesea.

O le aofaiga o le tupe na aafia i le gaioiga solitulafono e $9,788.00.

O Faititili Taifau Otineru na amata le fua a le faamasinoga i sona faasalaga i le 2 tausaga ae na toesea le 21 masina ona o ona itu lelei e pei o lona ioeina o moliaga a leoleo ma le laititi o ona tausaga ua manatu le faamasinoga e tuu avanoa iai ona o se tasi e talavou e mafai ona toe aoaiina lona tagata i le solitulafono muamua faatoa tulai ai i le faamasinoga.