I le va o le masina o Aperila ma Me o le tausaga na te’a nei 2023, e 32 gaioiga solitulafono na faatino e Arieta Segifili Magele a o galue i le faletupe o le Pasefika poo le Bank of the South Pacific i Apia, ma toesea ai i se auala solitulafono se tinoitupe e tusa ma le 41 afe 919 tala ma le 41 sene o se meatotino a lea faletupe faapisinisi i lo tatou atunuu.
O lea ua amata tuli nei le faasalaga faafalepuipui e 3 tausaga ma le iva masina o Arieta ina ua suia lana tali tetee i moliaga e 32 a leoleo i lona ioeina uma.
I tolaulauga a leoleo sa folasia i le faamasinoga o loo faailoa ai, o Ianuari o le tausaga na te’a nei na fesoasoani ai lē ua nofosala i se mataupu a se tagata e iai sana teugatupe i lea faletupe, ma o le gaioiga lea na ia silafia ai loa ona faia se gaioiga e mafai ona saofagā atu ai i isi teugatupe ma amata ai loa ia Aperila o le tausaga lava na te’a nei ona ia toesea seleni mai nisi o teugatupe.
O lē ua nofosala ua 32 tausaga o lona soifua, ua faaipoipo ma e to’alima ona alo.
