O lea ua faasala e le Faamasinoga Faaitumalo a le atunuu se alii faipisinisi Saina i le salatupe e 130 afe tala, ina ua faamaonia ai lona taumafai i se auala faasolitulafono, e aveese ai ma Samoa se pusaoloa o se uta o figota e aofia ai sea, fugafuga ma maisu.
O ni figota e manaomia tele i atunuu Asia e pei o Saina ona e gasese ai taumafa o ni matai’ai a ia atunuu.
O le alii o Qinping Yan na amata suesueina lana solitulafono i le tausaga e 2020, tusa ai nei ua fā tausaga o faagasolo lenei mataupu ma oo ai i le faamasinoga, lea na valaau i le Aso Faraile ua mavae e lau ai le faasalaga.
O le isi moliaga o le alii Saina o lona taumafai i se auala faaalatua e taofia ai le suesueina e le ofisa o le tiute o lana pusaoloa, lea sa ia ave ai le 5 afe tala i le Ofisa Sili sa iai o le Matagaluega o Tiute ma Tupe Maua.
E lei oo atu lē ua molia i le lauina o le faasalaga o lea moliaga ona sa gasegase ma ua tolo mai ai i le amataga o lenei vaiaso.
Peitai ua faailoa e le faamasino o loo tauaveina lenei mataupu le afioga Leota Raymond Schuster i taualumaga a le faamasinoga i le Aso Faraile na te’a nei, e 12 masina i le falepuipui ua fuafua e faasala ai Qinpin Yan.
O loo talosaga le loia a lē ua molia pe maua se avanoa e 3 masina pe a uma ona tuli lea faasalaga e togitogi ai le sala tupe.
O se tali o lea talosaga o le a faato’ā faailoa i le lauina o le faasalaga i le Aso Gafua.
O loo fautuaina e loia a leoleo le aveese faamalosi ma Samoa pe tipoti i lona atunuu lē ua molia pe a mae’a ona totogi lana sala tupe ma tuli lona faasalaga i le falepuipui.
