Ua amata tuli nei le faasalaga faafalepuipui e iva tausaga ma masina e 9 o le alii talavou o Misiauro David Tua Ovaleni Tatupu o le nuu o Faleatiu, ae e iloa foi i isi ona igoa o Misiauro Ovaleni, ma Misiauro Talimatasi Faisauvale 22 tausaga le matua.
Sa molia o ia i lona faaoo o le maliu i se tama talavou e mafua i le leiloa o le solofanua se’i tulou a le uncle o Misiauro.
Faaalia i faamaumauga a leoleo na logotala lē ua faasalaina ma nisi o lona aiga e aofia ai lona uncle e ana le manu, o le fale o lē ua maliu o loo iai le solofanua, ma aga’i loa iai i se fanua i uta.
Sa tauave e Misiauro se laau malosi o le ituaiga o le 22 semi automatic e lē faatagaina i Samoa.
E taunuu i le fale o lē ua maliu o loo nonoa le manu i fafo, ma sa faamalie iai lē ua maliu o le manu sa ia maua ma avatu ai nonoa i lo latou fanua, ae toe o ma ave.
Peitai na taumafai le uncle o Misiauro e faaoolima i lē ua maliu.
Na momo’e ese ai o ia ae tuliloa atu i pulufana ma lavea ai se vaega o le patua o le tama ua fano le soifua.
Sa talosaga le loia a lē ua faasalaina mo se faaitiitiga o tausaga o le faasalaga ona i le taimi e le’i tulai mai le solitulafono o Misiauro, sa lima taumatau iai lona tina i le tausiga o lona aiga ona sa falepuipui lona tamā.
E le’i talia lea talosaga e le faamasino ma faatumau ai le faasalaga e iva tausaga ma le iva masina.
O lē ua molia ma faasalaina o se tagata ua iai ni aafiaga i lona mafaufau ona o lona faaaogāina o laau faasāina o le maruana ma le aisa.
O le fautuaga lea a le faamasinoga i tupulaga o Samoa ia tau mamao ese ma fualaau faasāina, auā o le tasi lea o aafiaga e oo iai.
