E faitau selau tina ma tamaitai mai soo se vaega o Samoa na faia se savali o le filemu i le taeao nei e faaali lo latou lagolago i le 6 nofoa e atoa ai le 10 pasene o tamaitai o le Palemene ma o le latou lava lea mau.
O lenei savali na amatalia mai i le 6 i le taeao taimi Samoa ma o loo maopopo nei i le Malae o le faautugatagi i Mulinuu e tālia ai le iloiloina o le apili o le mataupu o le nofoa faaopoopo lea e faatautaia i le taeao nei.
E tusa ai ma ripoti na taua e nisi o tina na faatalanoaina i le taeao nei e tatau lava ona atoa le 10 pasene o tina i totonu o le maota fono ma o le auga lena o le auai mai i lenei solo filemu e tuu atu lo latou mau e tatau ona faamalosia le numera o tina i le palemene.
O nisi o tina ma tamaitai na malaga mamao mai Puleono i Salafai faatasi ai ma le atu Aleipata ona o le molimoli mai o lo latou manatu ina ia unaia le malosiaga o tamaitai i upufai o malo.
Peitai e le gata o loo iai nisi o tina ma tamaitai i se solo filemu i le taeao nei e unaia le 10 pasene ae o loo iai foi le vaega a le SSIG taitai mai e Unasa Iuni Sapolu i le isi itu e faaali le latou lagolago i le galuega a faamasino pe o le 10 pasene e tusa ma le to’alima pe e faaopoopo se sui se to’atasi.
Taua foi e Unasa poo le a tonu le uiga o le laina faaitulua a lea savali filemu lea na faia i le taeao nei ae o loo agai mai afioga i faamasino e iloiloina le mataupu o le nofoa faaopoopo.
O se taimi lata mai ona faailoa mai lea o le iuga o le apili i le mataupu o le nofoa faaopoopo o tamaitai o le Palemene lea na tuu atu ai le talosaga apili a le vaega faaupufai a le HRPP.
