O le afiafi o le aso ananafi na faalauiloa mai ai e le Matagaluega o Leoleo nisi o latou faamaumauga o soligatulafono o loo maitauina le tulai mai pea i le tele o aso.
O loo faamauina le galulue pea o le Matagaluega o Leoleo e taumafai e taofi soligatulafono e pei o le faomea matuiā ma osofa’iga i le tele o faleoloa ma fale anagatā e faaaogā ai taavale.
Ma mai i le tuufaatasiga o faamaumauga a leoleo ua lipotia mai ai, o loo molimauina le alu i lalo o le numera o osofa’iga e faaaogā ai taavale poo ram-raids ma ua maitau le fesuisuia’i o ia fuainumera e pei ona iai se pa’ū maualalo i lea soigatulafono na faamauina e 15 mataupu i le masina o Aperila 2024 faatusatusa lea i le 86 o mataupu o le masina o Aokuso o le tausaga e 2022.
O le faomea matuiā poo le aggravated robbery o loo faamauina e leoleo e oo atu le 534 i latou na faatinoina lea soligatulafono ma na faapena ona faatino taualumaga o latou faamasinoga, ma e faaopoopo atu ia i latou nei e 99 i latou e lē o faatino ni faamasinoga ae o loo auai i nisi o polokalame mo tupulaga e fesoasoani atu i lea soligatulafono o le faomea mo le 12 masina.
I le mata’ituina o nei mataupu, i faamaumauga e 63% lea ua siitia ai galuega faatino a leoleo e pei o le savalia e leoleo poo foot patrols i totonu o aai o Aukilani pe a faatusatusa atu i le piriota o Aperila 2023 e agai mai i le masina o Mati 2024 ma le isi 12 masina mai ia Aperila 2022 e agai ia Mati 2023.
E 378 fanauiti ma le 101 o talavou na tuuina atu i le Fast Track mo le tele o polokalame ma faalapotopotoga talu mai Tesema 2022, ma ua faamauina e 70% o ia fanauiti ma le 88% o talavou e lei toe tuuina atu lava pe ua toe refer atu.
Ua faamauina e oo atu i le 3,737 galuega faatino i tulaga tau puipuiga e ala atu i le Retail Crime Prevention Programme, ma e 883 faleoloa ua faatino ia vaega.
E 2,254 moliaga ua folasia faasaga i le to’a 383 o tagata na faatinoina soligatulafono e le vaega o le Police’s National Retail Investigation Support Unit talu mai le masina o Me 2022.
Na faailoa e le Sui Lagolago o Su’esu’ega ia Paul Basham, o le faatino o gaioiga taufaamata’u e faatupula’ia ai le popolega ma le fefefe o tagata lautele ma e lē o se tulaga e talafeagai lea itu o le nofo popole ma fefefe o tagata i taimi o galuega.
Ma o lea ua galulue malosi le matagaluega e faato’afilemuina finagalo ma loto o tagata ma faamausalī le malupuipuia o i latou.
Na ia faailo foi e lē tuumāmāina e leoleo soligatulafono e faatino e soo se tasi lava.
