O le auaunaga lenei faafaiaoga o se tasi lenei o auaunaga pito i tāua i le atinaega o le atunuu e agai tonu lea i le faafaileleina o le ola aoaoina o alo ma fanau a le atunuu e pei ona iai le faamoemoe i le aso o le aloaia lea o le auaunaga a nisi o Faiaoga i totonu o le Matagaluega o Aoga ma Aganuu.
O i latou na aoaoina i le 6 vaiaso i le polokalame e faailoa ai le tulaga o le faatinoga o auanaga ma vaega eseese o loo faatino e le Matagaluega poo le Induction program.
Faailoa ai e le Minisita o Aoga ma Aganuu, Afioga Seuula Ioane Tua’au i Faiaoga na auai i lenei polokalame o le galuega faafaiaoga e ese ma le tāua.
“O le faatofalaiga faafaiaoga o se tofa loloto poo se auaunaga e tele lona sao tāua i le atinaega o a tatou galuega.
“O le avea ai o oe ma Faiaoga e lē se galuega e faigofie, e mate gata ona uiga, e lē faata’eta’ealuga ana faaiuga, e sauoo ana tapenaga e aafia uma le soifua faaletino, mafaufau ma le agaga.
“O le faatinoga a le Fomai ia soifua maloloina lelei le tino ae o le faatufugaga a le Faiaoga e lē gata ina ia maloloina ai le tino ae sili ma tomai i mafaufauga.”
O le faamanatu a le Minisita ia aua ne’i manatu faatauvaa ia i latou ua afu le tautua i lenei auaunaga.
“O le filosofia faafaiaoga e poto a le tagata ua leva ona soifua, ioe aua ne’i vaai maualalo i ē na mua i malae.
“Manatua Faiaoga, o le upu lava a le atunuu, “E fesili muli mai ia mua mai”, i oe ne’i e masausau atu ma si au agiagi ae vaalau mai se toeaina poo se olomatua vaai na e apulupulua lau tikeri lea na e sau ma oe.
“Fai muamua sau galuega, aua ne’i valetuulima lo outou valaauina soo se mea e pito sili ona aogā o alo ma fanau a le atunuu.
“O le manuia o alo ma fanau a Samoa o loo i o outou aao.”
