Na amata ile aso Tonai na tea nei le piliota ua faataga ai ile tulafono ona faia talaiga faalauiloa poo faatosina a sui tauva ma pati faaupufai mo palota laiti o loo loma, o le a toe sailia ai ni sui usufono o Vaa o Fonoti, Siumu, ma Faleata 4 ile Palemene.

O lea piliota e faatoa faamuta ile vaeluaga o le po o le aso Lua aso 12 o le masina fou o Setema ao lumanai le palota muamua ma palota laiti o le a faagasolo ile aso Lulu 13 o Setema ma le aso Faraile 15 o le masina fou lava.

O le aso Toonai na tea nei na feiloai ai le taitai ma sui o le vaega faaupufai o le Faatuatua ile Atua Samoa ua Tasi ma le itumalo o Vaa o Fonoti, mo lana faalauiloa masani e le gata o lana sui tauva mo le palota laititi a lea itumalo, ao le faailoa foi o manulauti ma taiala o loo ave iai le faamuamua o ana faiga faavae ile pulega o le Malo.

E iai le talitonuga o le a faatino foi e le vaega e puipuia aia tatau a tagata ana faalauiloa mo ana sui tauva i itumalo e tolu o le a toe faia a latou palota laiti. Ae ile feiloaiga a le Komesina o Faigapalota ma le vasega o tusitala ina ua tapunia le lesitalaina o sui faatutu mo ia palota laiti, na faailoa ai e le Komesina o faigapalota le afioga Tuiafelolo Alexandra John Stanley, e toavalu ua maea faaulu suafa ina ua faamalieina uma aiaiga o le tulafono o faigapalota