E le o toe mamao uma le fesoasoani a le malo o loo fesoasoani i le tau o le suauu, ma o lea ua fai mai le Palemia Chris Hipkins o loo iai isi fesoasoani a le malo o loo vaavaai iai.
O le fuel excise duty na toe faaopoopo e le malo masina e faaauau mai ai pea ona o le taugata tele o le tau o le suauu, ma e ui la o lea na toe tuu mai isi masina faaopoopo ae o lea lava na manino, e uma i le aso mulimuli o Iuni.
O le fesoasoani lenei o lea na muai faia e le malo i le masina o Mati o le tausaga talu ai ma le tala e na o le tolu masina, peitai o lea ua silia ma le tausaga o faaauau pea.
Fai mai ai le minisita o tupe Grant Robertson o se fesoasoani tele i tagata ona o le taugata o le soifuaga ua iai nei.
E ui la e le o manino mai i le taimi nei poo ā isi fesoasoani o loo talanoaina e le Kapeneta, ae pau le itu ua faamaonia mai e le Palemia e iai isi i totonu o le paketi ma o loo taulai lea i tagata o loo matuai moomia le fesoasoani ona o le taugata o le soifuaga ua iai nei.
