Fai lava si tuai o le tali atu o le malo o Niu Sila i ona tagata o loo poloka i Isaraelu, ae ua fia o ese mai.
Molimau mai lea mai tagata Niu Sila o loo i Isaraelu i le taimi nei i le tuai o le tali atu o le malo faapea le matagaluega o le va i fafo a o fesootai mai ai i telefoni.
E oo atu i le 54 tagata Tonga faapea tagata Kiwi na o i le aumalaga a le Connection City Church Assemblies of God mo la latou malaga taamilo i Isaraelu, ma i tala a le Herald, o loo molimau ai Pesi Sikalu i le lagona fefe ma le lē mautonu o iai.
Saunoa ai Sikalu o le faatuai tele o Niu Sila na fesootai ai loa ma le malo o Tonga ma o lea foi ua taumafai atu le malo o Tonga e fesoasoani i tagata o la latou ekalesia.
Ua faatusa ai e Sikalu e laititi Tonga pe a faatusa ia Niu Sila i lona tulaga faavaomalo ae telē le loto.
O lea foi ua auina atu e Tonga le sui o le konesula latou te malaga faatasi mai, ma o ā lava foi tupe e moomia, o le a faatupe uma e Tonga.
Mai le malo o Niu Sila o lea o loo galulue pea nei ma le kamupani vaalele a le Etihad Airways e aveesea mai tagata Kiwi o loo i Isaraelu, ma a o ta’u ai o se aso e lē o toe mamao faataunuuina nei faigamalaga, e lē o mautinoa.
I o tatou uso tuaoi ia Fiti, o lea foi ua aumai e le malo o Fiti ona tagata e silia ma le 200 faatasi ai ma nisi o tagata Pasefika mai Isaraelu.
O le faigamalaga togipau a le Fiji Airlines lea na aveesea mai ai ma na taunuu manuia ananafi i Fiti, faatali mai ai e le Palemia ia Sitiveni Rabuka i le malaevaalele.
O tagata Ausetalia e faapea foi, ma o tagata Ausetalia uma foi o lea e aveesea mai e le faigamalaga a le Qantas, totogi uma e le malo.
