Ua faaauau i le asō su’esu’ega a leoleo i se isi foi faamata’u ua alia’e i le Tiktok faasaga i se faletapua’i o le faatuatuaga Musalemi i le itu i Saute i Sisifo o Sini.
Ua faaopoopo atu lea faamata’u i le isi foi faamata’u sa su’esu’eina mai le amataga o le vaiaso sa faia foi faasaga i le faletapua’iga i Lakemba, o le faamata’u fou lea ua aga’i i le faletapua’i i Padstow i Sini lava.
O loo ta’ua ai i ia faamata’u ma le faalavelave na tupu i Kalaiesetete na maliliu ai tagata e to’a 51 na tafana i totonu o faletapua’i i le 2019.
E manatu leoleo e iai sootaga o faamata’u uma ia e lua ma o loo silasila iai ma le toto’a.
O se mataupu ua tuuina mai ai se finagalo faaalia o le Premier o NSW, Chris Minns ma ta’ua ai ua faia nei le su’esu’ega a leoleo ma afai ae maua i latou o loo faia nei solitulafono o le a feagai ma le malosi o le tulafono.
Na ta’ua foi e Minns e leai se avanoa o faiga faailogalanu ia ma faailoga tapua’iga i totonu o Niu Sa Uelese.
Puna o Faamatalaga: https://www.abc.net.au/news/2025-03-21/nsw-mosque-padstow-second-threat-lakemba-police/105079926
