Ua tatala nei le avanoa mo nuu ma itumalo faapea faalapotopotoga ma ekalesia i le atunuu e faailoa ai i le Komiti o tapenaga o le faailogaina o le iupeli taimane poo le 60 tausaga o le Tutoatasi, ni a latou tapenaga i ni sauniga o le a faatino e faailoga ai le aso fanau o le Malo tutoatasi o Samoa.
Ua faailoa e le tamaitai Palemia le afioga Fiame Naomi Mata’afa o le a tuuina uma ia tapenaga i le kalena o polokalame o le tutoatasi o le a faailoga i totonu o le tausaga atoa e amata atu i le aso muamua o le masina fou o Iuni. Ua faamautu lea fuafuaga a le komiti o le tutoatasi ina ua mae’a ona faalauiloa le faailoga poo le Logo ua autu iai polokalame uma o le faailogaina o le Iupeli Taimane o le tutoatasi.
O le sauniga faalemalo e faailoga ai le amatalia o polokalame o le 60 tausaga o le tutoatasi, ua faaalia e le tamaitai Palemia le afioga Fiame Naomi Mata’afa, o le a faia lava le sauniga i le malae o le faautugatagi o Ti’afau i Mulinuu, ae ua na o le valaaulia o le a auai, ae leai ni solo ma tulai faaaloalo e pei ona masani ai. E lei faamautuina isi fuafuaga o tapenaga mo lea sauniga faalemalo. O le a leai ni malo valaaulia mai atunuu i fafo ona o tulaga o loo iai puipuiga o le atunuu mai le faama’i.
