Ua lipotia le maua atu e leoleo o se tamaititi 12 tausaga ua maliu i se fale i Balgownie tusa ma le ‘afa itula talu ona tupu se faalavelave tau taavale e lata ane i Wollongong ma o loo suesue nei e leoleo pe iai se sootaga o mataupu nei e lua.
Poo le tea o le ‘afa o le tasi i le vaveao analeila e pei ona lipotia e le 7news ae valaau ane leoleo i se faalavelave ua lipotia ai le ituaiga taavale o le Holden Barina o loo aga ane i le itu i Matu o Memorial Drive ma ua lavea i traffic lights i le faaitu lea i le fetaulaiga ala i Towradgi.
E taunuu atu leoleo ua sosola ese tagata sa i totonu o le taavale ae ‘afa itula mulimuli ane poo le ta o le 2 i le vaveao ae valaau ane le fesoasoani faavavave i le fale lea i Balgownie lipotia ane ai se tamaititi 12 tausaga o loo tigaina manuaga.
Na togafitia e paramedics le tamaititi ma auina atu ai i le falemai i Wollongong lea ua lipotia mai ai ua maliu. O loo faaauau nei le suesuega i nei faalavelave e lua.
