E fai si tetele o tupe o loo ofoina ane i paketi tau galuega i Ausetalia mo i latou o tagata faigaluega o le a lusi galuega pe a faataunuu pea le fuafuaga a le kamupani fasimanu i Timaru e tapunia lona lālā lea i Smithfield.

O le masina talu ai na faalauiloa ai le fuafuaga lea a le Alliance Group ma lipotia atu foi i talafou ua feta’ua’ina ai e ono oo i le 600 tagata faigaluega e aafia ai.

E moni e lei faamautūina le faai’uga peitai ua lipotia i le asō e le kamupani sa’ili galuega le Canstaff e faitau 100 avanoa faigaluega o loo latou faasalalauina e lē gata i le North Island ae faapea foi mai Ausetalia e silia ma le 350 avanoa o loo ofoina mai ai.

Na ta’ua e le alii pule o le Canstaff o nisi o tagata faigaluega i le fale fasimanu lea i Timaru ua silia ma le ta’i 20 tausaga i le galuega ma o i latou ia e sa’ilia tele e fale faigaluega faapea ona o le tomai o loo iai.

Na ta’ua e le agency lea o paketi o loo ofoina ane mai Ausetalia e aofia ai le oo atu i le 5 afe a le tagata e to’atasi e fesoasoani mo lona aiga i le aga’i atu ai i Ausetalia ma o avanoa o loo iai o loo i Sini faasolo atu i isi vaega e pei o Kuiniselani.

O loo tuu i le faitalia a le tagata faigaluega ae to’atele ua silasila i ia avanoa ma faamanuiaga.

Puna o Faamatalaga: https://www.1news.co.nz/2024/10/09/timaru-meat-workers-look-at-overseas-job-opportunities-recruiter/