Pe afai ae toe manumalo mai le vaega faaupufai a le Labour i le faigāpalota lautele e toe taitaia le malo, o lea ua latou folafola mai le faia o se Visa fou e ta’ua o le Amnesty Visa mo tagata ua silia ma le 10 tausaga o nonofo faasolitulafono poo overstayers i totonu o Niu Sila.
I se saunoaga a le sooupu o femalagaa’iga faavamalo a le Labour, Hon Andrew Little, na ia ta’ua ai, o lenei visa ua faataunuu ai se folafolaga sa faia e lē sa avea ma Palemia talu ai, Hon Jacinda Ardern, ina ua ia faatino se faatoesega i le lua tausaga talu ai, ona o osofaiga faavaeluapo poo le Dawn Raids sa faatino e leoleo a Niu Sila i na vaitau i tagata sa ova aso na nonofo ai.
E lē gata i lea, ua faatulaga foi e le Labour Party se visa fou ua ta’ua o le Super Visa, mo mātua (parents and grandparents) o tagatanuu o Niu Sila.
E amanaia e le Labour Party, le sootaga lea o mātua ma fanau, i latou ua motu mai ma le taula e pei o lea upu a le atunuu, ua aumau i Niu Sila nei ona o sailiga manuia, ae ua avea ma itu ua umi ai ona motusia sootaga ia ma mātua, semanu o le mafuta faatasi ma nai mātua i lenei atunuu, o se fesoasoani tele i o latou mafaufau le faalogo atu i upu tima’i mai mātua, aemaise le latou nofonofo mai i laoa ma maota ma tapuaia faiva ma tiute o fanau i aso taitasi.
Ma pe afai o le a toe filifilia mai le Labour Party i le faigamalo, o le a latou faatulaga se visa mo le umi e 10 tausaga e aogā ai (10-year multiple entry Super Visa), ae i totonu o lena 10 tausaga, o le a mafai e mātua ona faimalaga mai ma nonofo i Niu Sila nei ma latou fanau mo se umi e i le va o le 6 masina pe 5 tausaga ma toe taliu i o latou atunuu.
O lenei visa o le a pa’ū atu ai le tiutefai o le tausiga o mātua i le itu tau seleni a o iai i totonu o Niu Sila, ia i latou na faatalosagaina le visa, poo a latou fanau ia ua nofomau pe sitiseni i Niu Sila, ma o loo iai ni a latou inisiua tau falema’i ma isi vaega faapena e moomia.
O lenei foi visa mo mātua o le a lē faatulaga mo na o se vaega poo ni vaega patino o ni tagatanuu, ae o le a tatala mo soo se mātua mai soo se atunuu.
