Ua mausalī le faai’uga a le Kainga Ora ua tapena iai e faia faasaga i tagata o loo aitalafu i ona fale.
O aitalafu nei ua fai si umi o tulituliloa ai pea e le Kainga Ora nisi, peitai e lē o mafai ona ausia sini o loo naunau iai le pulega, ma ua fai mai ai o le a iai le taimi faatapulaa e faataga ai tagata nei e mafai ona aitalafu ai i peimeni o fale.
E lē o iai se faamoemoe e momotu maliega o fale ua mae’a sainia ma aiga o loo aumau ai i le taimi nei, ma o le suiga ua iai nei o le a taumafai ai e vave tuliloa aiga i taimi e lē totogia ai fale.
E fua lava foi le faai’uga i nisi o itu ma faatalanoaga i aiga ta’itasi, ma afai lava ae leai se taunuuga manuia o lona uiga o le a oo loa i le Tenancy Tribunal e faamuta ai maliega ua mae’a sainia mo fale nei o le malo.
A o le’i aga’i ai le Kainga Ora i le faiga fou lenei, o lea lava foi o le a faamagalo le tusa ma le ‘afa o aitalafu o loo iai nei, ma e iai aiaiga, e mafua lea ona o se tasi lenei o faapogai o le faafitauli o loo iai.
O aitalafu nei i fale a le Kainga Ora ua pa’ū mai le $21.6 miliona na iai ia Ianuari o le tausaga talu ai i le $16.1 miliona ua iai i le tausaga nei.
Puna o Faamatalaga: Kāinga Ora to get firmer on rent payment arrears
