E 23 tausaga o se taulealea o le pitonuu o Sapulu i Salelologa na maua ua maliu i se sailiga i le sami a le vaega maulu a leoleo poo divers.
O le taeao o le Aso Sa na faailoa ai e leoleo lea sailiga ma ta’ua ai o lē ua maliu sa alu sona faiva.
O loo iai pea Samoa i uiga maaleale o le tau e pei ona faamalosia ai fautuaga mo gataifale ma timuga mamafa faapea lologa ma ua fautuaina ai e leoleo le au tautai o le atunuu, e tausisia fautuaga o uiga faaletonu o le tau o loo aafia ai le atunuu. O loo faaauau suesuega a leoleo i le faalavelave.
O loo faaauau pea foi sailiiliga a leoleo e aunoa ma se moliaga ua faia faasaga i le tamaitai 24 tausaga le matua, lea na mafai ona alu ese ma Samoa i se malaga a le vaalele o le Fiji Airways i le Aso Toonai 24 o Tesema o lena tausaga ua alu atu.
Ua faailoa e leoleo o loo talia le suesuega faalotoifale a le Pulega o Malaevaalele o loo tuliloa ai mafuaaga o le mafai ona alu ese o lea tamaitai ma le atunuu e aunoa ma le iai o ni ona pepa malaga e mafai ai ona ulufale i le vaalele.
Na maua le tamaitai i totonu o se faleui e ni tagata faigaluega o le malaevaalele i Nadi i Fiti ma toe faafoi mai ai i Samoa i se malaga lava a le Fiji Airways o le Aso Gafua 26 o Tesema 2022.
