Ua foi mai su’esu’ega ma fai mai, na solitulafono le vaai o leoleo i faamaumauga i le taimi a o su’esu’e le fasiotia o le satini sinia ia Lyn Fleming.
O su’esu’ega nei na faia lava i totonu o le ofisa o leoleo i le masina talu ai ina ua maua o lea na iai sui o le ofisa na su’esu’eina faamaumauga e faatatau i le maliu o le tamaitai leoleo.
O se mataupu foi na sau ai ma le imeli mai le sui komesina i le aufaigaluega i le masina faato’ā uma atu, o lea e manino o loo iai nisi o le aufaigaluega sa lē tatau fua ona vaavaai i faila nei o loo i le National Intelligence Application, ma o se matuā soli i ta’iala o loo limata’ita’iina ai auaunaga faaleoleo.
Fai mai ai le ausu’esu’e ua maua o nisi o le aufaigaluega o lea lava na aga’i ma vaavaai i faila nei e ui e leai ma se mafua’aga tatau.
Na lipotia e le 1News ua toe ta’utino sui o le aufaigaluega na vaai iai faasolitulafono, ma e lē o toe iai nisi su’esu’ega faaopoopo o faia faasaga ia i latou.
Mai le peresetene o le asosi a leoleo, Chris Cahill, o le fuainumera o i latou na faia, e faitau ta’i sefulu, ma e lē oo i se ta’i selau.
Puna o Faamatalaga: Audit finds police officers illegitimately accessing sensitive case files
