A o tālia ai le lauina o le faasalaga o le ave faamalosi o se tagata poo le kidnapping o loo molia ai ni taulele’a ma ni matai o le nuu o Lefagaoalii i Savaii, ua faailoa e le loia o loo finauina moliaga a leoleo ua maliu se tasi o matai o loo molia o ia lea o Aitauia Ioasa Lemau 70 tausaga o le soifua.

O lē ua maliu o loo tālia le valaauina o mau a leoleo i le tasi o moliaga o loo ia teena o le taumafai e faaoo le maliu le attempted murder.

Sa tatala o ia i tua i ni aiaiga e faatali ai le su’esu’eina o lea solitulafono, ae o le to’asefulu e aofia ai ni taulele’a ma ni matai ua latou ioeina le moliaga o le ave faamalosi o se tagata, o loo taofia pea i le falepuipui i Tanumalala talu mai Tesema o le tausaga na te’a nei e faatali ai le lauina o se faasalaga.

O loo faatali le lauina o lea faasalaga i le mae’a o se su’esu’ega a le faamasinoga i se vaega o tolaulauga a leoleo o loo teena e nisi o loo molia, ma o le aso 3 o le masina fou o Mati e aumai ai se faai’uga i vaega o tolaulauga a leoleo poo le police summary of facts o loo tetee iai nisi o loo molia.

O le aso 13 o le masina nei o Fepuari na maliu ai Aitauia i ni āuga o se gasegase ma sa molia o ia faatasi ai ma le isi to’asefulu o loo nofo taofia ona o le gaioiga na saisai ai aao poo lima ma vae o se matai o le nuu o Lefagaoalii ae tui ai se amo (se’i tulou) ma sa’esa’e i totonu o le nuu.