O le mau lea a le Taitai fou o le vaega faaupufai a le Green na faia faasaga i le alii Palemia, pe a uma ane ua leai ni fale e nonofo ai fanau ona o suiga ua fai agai i tagata faatupu vevesi o loo nonofo i fale o le Kainga Ora.
O le Aso Gafua lea na faailoa ai e le malo ua tatau ona mamafa faaiuga e faia faasaga i tagata o loo nonofo i fale a le malo, o i latou o loo faia pea amioga o le faatupu vevesi i ia nofoaga.
Ma o nei faaiuga e aofia ai ma le faatulai ese.
I totonu o le maota fono ananafi na fesiligia ai e Chloe Swarbrick o le Green le Palemia, pe faamata e faamavae pe a alualu nei ae aafia atu ai ma fanau.
Tali a le Palemia, e lē o iai se manaoga e faatulai ese peitai o loo iai le faaiuga e tatau ona faia e tagata matutua ina ia o latou malamalama ia latou matafaioi a o nonofo i fale o le malo.
Na ta’ua foi e le Palemia e tusa ma le 24,000 tagata o loo faatalitali i ni o latou avanoa i fale nei, ae lē gata i lea o tuaoi ma le lautele o tagata o loo aafia i amioga faatupu vevesi a nisi o i latou, ma o tagata nei o loo tu ai le malo.
O le Green o lea lava o loo latou teena le suiga ua faailoa mai e le malo, ma ua o latou faaigoaina o le lē alofa.
