E lei taitai mae’a tapenaga a aiga ma le faamamāina o si’omaga talu aafiaga o le afā malosi o Helene na aafia ai le Setete o Florida ae o lea foi ua toe faailo i le asō e iai le isi afā foi o loo fotua’i atu e igoa ia Milton ma ua āga atu foi mo gataifale o le setete i ni nai aso o lumana’i ai.

O le taimi nei o loo faaauau galuega faamamā i le setete ona o faiga a Helene lea na aafia ai i le aso 26 o Setema, o se afā malosi sa faatulaga i le vaega lona 4 poo le Category 4 i le faatulagana o ‘afa malolosi.

Fai mai o Milton o loo i le Vaega Muamua, Category 1 ma e ono oo le malosi o ona savili i le 80 maila i le itula e pei ona tuuina mai ai le fautuaga mai le National Hurricane Center.

O le taimi nei o loo iai Milton i le tusa ma le 815 maila i le itu i Saute Sisifo o Tampa i Florida lava.

O le Aso Lulu ua fuafua e aafia ai le Gulf Coast o Florida ma e oo atu iai ua siitia lona malosi i le Vaega 3.

O loo fautuaina aai e pei o Miami, Orlando ma Tampa i timuga ma e mamafa.

O le faai’uga o le vaiaso na fofogaina ai e le Kovana o Florida le State of Emergency poo se poloa’iga o faalavelave faafuase’i mo Florida ae o lea foi o le a toe osofa’i atu e Milton ma ua fautuaina tagata uma ia nofo sauni.