Ua faaauau pea ona masaa atu i aiga o le afioaga o Samatau faamanuiaga ma fesoasoani mai le polokalame ua faaigoaina, O le isi augatupulaga o sosoo ai o le nuu o loo alaala ma aumau i atunuu i fafo, le Samatau Next Generation (SNG), i le auga autu lava ia faasoa atu mo le manuia o tagata o le afioaga.

O se foai tupe e 3 afe tala mai le sosaiete lenei, ua tuuina atu mo le sosaiete a faifaatoaga o Samatau i le faamoemoe e unaia ai faatoaga  a le nuu e le gata mo le maua ai pea o taumafa ae o isi fuafuaga o le tamaoaiga. 

O le foai mo le sosaiete o faifaatoaga a le afioaga, o le vaega tolu lea o fesoasoani o loo gafa ma le SNG poo le Samatau Next Generation lea e aofia ai le lagolagoina o auvoli ma le autaitoafitu a le nuu, faapea kesi ma nofoa mo le aoga tulagalua.