O lu’itau ua feagai nei ma le faigamalo e pei o le va o le fogāvaa i le lotoifale o le vaega faaupufai o loo tu i le pulea o le malo ma le atunuu, o le leaga o le tau talu ai nei ma le pē o le eletise i le motu o Upolu, ua ave ai se fautuaga a le Komisi o galuega a le malo i matāgaluega ma auaunaga uma a le malo, e mafua ona o manatu o nisi tagata faigaluega ua salalau i fesoota’iga televavae le social media.
I le Matagaluega o Aoga ma Aganuu ua ave se lapata’iga i tagata faigaluega ina ia tausisia amioga taupulea ma tulaga taualoa i le faatinoga o tiute ma matafaioi.
Ua faailoa e le Ofisa Sili o lea matagaluega le afioga A’eau Chris Hazelman i se faasalalauga ua molimauina o lu’itau i le aafia o upufai o le malo i ni tulaga lē mautonu, leaga o uiga o le tau talu ai nei, ma le pē o le eletise ma le suavai ua avea ma avanoa e faaleo ai lagona o nisi o le aufaigaluega ma ua iloa ai le ‘au atu i se vaega faaupufai ma ua taufaifai ai i le malo.
Ua tele ai foi ma finagalo lē migao ua aga’i i nisi o auaunaga a le malo, ma o nisi foi ua lafo upu masoā ma fai tala mamafa e lē talafeagai ma le ta’iala ma faiga faavae o loo lima ta’ita’iina ai le faafoega o galuega a le malo.
Na faaalia e le Ofisa Sili o le Matāgaluega o A’oga ma Aganuu i lea lava faasalalauga, ua faailoa le finagalo o le Komisi o Galuega a le Malo e iai aafiaga o le faaali faalaua’itele o ia lagona ma manatu i auala o fesoota’iga e pei o le api o foliga poo le facebook.
O tagata faigaluega a le malo e pei ona faailoa e le afioga A’eau Chris Hazelman ia ‘alo’alosā mai le faaali o manatu i ia mataupu ae ia faatino tiute ma matafaioi e auauna ma tautua ai i le malo ma le atunuu.
E pei ona silafia o le tasi lea o to’a sa feagai ma le faigamalo fou ina ua pale atu, o le faigatā ona faagasolo galuega ia latou fuafuaga ona ua fulitua nisi o le aufaigaluega a le malo, ma ua faatūtūgatā foi nisi e mafua i tulaga lē mautonu na tula’i mai i le mae’a o le palota tele o le 2021 lea na suia ai le pulega o le malo.
