O aafiaga o nisi o sooga o uaea malolosi e ta’i i lalo o le eleele ina ua sao iai le vai, o le mafuaaga autu lea na faailoa e le Minisita o Galuega Tetele e aofia ai le Faalapotopotoga o le Malosi Faaeletise na mafua ai le faaletonu na pe atoa ai le motu o Upolu i ni vaiaso e lei mamao atu.
Peitai o le aoauli o le Aso Lua o le vaiaso nei ua lata i le 4 ile afiafi na toe motusia ai foi le eletise i le motu atoa o Upolu, ma ua faatolu ai ona tupu lea tulaga.
Sa toe maua le eletise e nisi o vaega o le motu e aofia ai se vaega o le taulaga i Apia ae ua te’a le fitu ile afiafi, ae o nisi o vaega o le taulaga faasolo atu i nuu ma itumalo i sasa’e o Apia e te’a le valu ile po o loo pogisa pea.
O le vaiaso na te’a nei sa faatino ai galuega a le Malosi tau Eletise i le ta’iina o nisi o laina malolosi mai Siusega i le afi eletise i Fuluasou ma sa faailoa ai e le pulega o lea auaunaga a le malo le taofia o ia galuega ile faaiuga o le vaiaso ua mavae ona sa faaletonu le tau.
Ae na sosoo le tuanai o ia uiga faaletonu o le tau ma toe lagi lelei le aso Gafua seia oo mai i le Aso Lua ae toe motusia mai le eletise e pei ona toe aafia uma ai le motu o Upolu.
O loo faamalulu pea le faalapotopotoga i le atunu’u ona o tulaga motiusia o le eletise, ae o se faasalalauga faalauaitele mai le faalapotopotoga i le vaiaso na tea nei na faailoa ai lo latou talia o faasea ma lagona sa’i atu o le atunuu aua ua nao latou lava o loo maua ai lea auaunaga taua.
O le tuai ona ola o nisi o vaega o Upolu ona na faailoa e le malosi tau eletise sa femoumoua’i le malosi faapea le le gafatia e le tise o le manaoga le mafuaaga sa faatuai ai ona faaola vaega e pei o Lefaga ma se vaega o le taulaga le beachroad feeder.
