Ua faasolomuli ma ave i tua mai le Faamasinoga Maualuga le talosaga a le vaega faaupufai e puipuia aiātatau a tagata, lea sa autū i le finauina o se poloa’iga a le faamasinoga e aveesea ai le tofi Palemia mai le sui faipule tamaitai o le itumalo palota o Lotofaga le afioga Fiame Naomi Mataafa.
O le mau sa faavae ai lea finauga ona ua lē o toe ia te ia se numela fulisia o nofoa e 53 o le Palemene e faaauau ai lana ta’ita’iga i le tofi palemia.
Sa valaau lea mataupu i le Aso Gafua o le vaiaso nei ae sa toe tolopo mai i le Aso Tofi o le vaiaso nei lava se’i faatali muamua le isi gaioiga a le itu talosaga i le latou lafo o le lē faatuatuaina faasaga i le Palemia ma minisita o lana Kapeneta.
Sa manino i se finagalo o le afioga i le Faamasino Sili i lea tauaofiaga, afai e saofia le lafo o le lē faatuatuaina o le tali lea o le talosaga.
E 34 sui faipule na palota tetee ae na o le 15 na lagolagoina le lafo ma ua faaauau ai ona tauave e le sui faipule o Lotofaga le tofi palemia ma tumau ai ma minisita o lana Kapeneta i le Pulega Faatonu.
O le ave ai i tua o lea talosaga ua tālia ai nei se faai’uga a le faamasinoga i le tau poo cost e totogi atu mo itu na faasaga iai le mataupu poo itu sa molia e pei o le afioga i le Palemia, o le Fofoga Fetalai, o le Loia Sili a le Malo, ma le vaega faaaupufai o le Faatuatua i le Atua Samoa ua Tasi.
