O le faamalosia o puipuiga o le atunuu atoa a’o tapunia ai ona o le aafia o nisi o le atunuu o le faanofoesea i le faama’i, o auala o fesootaiga e galulue faatasi ai auaunaga a le Soifua Maloloina, o le Mālō ma le pitolaau a Tusitala ma le au faasalalau ua ave ai ma se tusi faaseā a le Asosi o Tusitala Samoa i le Faatonu Sili Aoao o le Soifua Maloloina ia Leausa Dr. Take Naseri.
O lea tusi faaseā mai le Peresetene o le Faalapotopotoga ua lāgā ai ni faanoanoaga i le muamua faailoa e le Faatonu Sili i se auaunaga tau faasalalauga i Niu Sila le faaopoopoga o tagata ua aafia i le siama o le faama’i ae o loo faatali le atunuu e ala atu i le tautua a auala o faasalalauga eseese poo le a se ripoti lata mai o puipuiga o le atunuu ma se numera o tagata ua faamaonia a latou suega poo tests.
Faaalia e le tamaitai Peresetene le susuga ia Lagi Keresoma e manino mai i le tulaga na tupu a lagomia loa le finagalo o le Faatonu Sili i fesili a Tusitala ona o lē maua lea o feiloaiga masani ma ua faaalia e le Peresetene o se isi foi lea o tulaga sa ia molimauina a’o pepesi le faama’i misela na maumau ai le ola ma le soifua o tagata e to’a 83.
Taua e Lagi “Ua leva ona tatou faatalitalia se update poo se tala foi lea mai le susuga Leausa faapena foi le Komiti o le NEOC e tusa ai ma cases ia na faaopoopo mai ananafi (Aso Lua) ae pei ua faateia uma tatou ona o lea tatou te talitali i se update ae lea ua oso mai Niu Sila”.
O lea faatalatalanoaga a Leausa na faasalalau i luga o upega tafailagi e se Ofisa Faasalalau mai Niu Sila a’o talitali pea sui Ofisa faasalalau i Samoa mo se tala lata mai mo le atunuu o loo faatali.
Faailoa foi e Lagi o le auga tonu lea o le tusi o le channel poo le communication ona ua agai muamua ripoti i Ofisa faasalalau i Niu Sila ae faatuatuanai Ofisa faasalalau a le atunuu peitai o Samoa lea e tupu ai le faafitauli i le pepesi o le faama’i. E le’o le taimi muamua lea ua tulai mai ai lenei faafitauli.
“Ou te manatua lelei le taimi o le misela, e sili musa le oso i media ia i fafo, o lea oute manatu ana le oo mai sui o le TVNZ e lē maua ai se avanoa e agai ai e interview”.
O le manatu maualuga o tusitala i le atunuu ina ia ave le faamuamua i le logoina o le atunuu e tauala atu i Ofisa faasalalau i Samoa ina ia mautinoa e manino faamatalaga taua ia mo le silafia e tagata lautele auā lo latou nofo saogalemu mai le faama’i o loo pipisi nei.
