O nisi o suiga fou ua aga’i mai mo galuega faavaitaimi, ua faamanino ma faailoa ai e le susuga ia Laufiso Tomasi Peni lea suiga auā le malamalama o tatou tagata o loo aga’i mai e sa’ili manuia i nei avanoa. 

O le taimi lenei o le tau mafanafana ua to’atele ‘aumalaga e aga’i mai Samoa ma isi atunuu o le lalolagi e galulue i le faamanifinifiina o le laau ona sosoo atu ai lea ma le pikiina o le faatoaga. 

O le suiga o tulafono o galuega faavaitaimi mai le malo, na faailoa lea i le aso 10 o Aokuso i le tausaga 2024. 

Ae o le aso 2 o Setema na faamalumaluina ai lea suiga, o vaega nei sa tuuina mai e le malo. 

O le taimi nei ua siitia atu i le 20, 750 tagata ua faatagaina e ōmai i galuega faavaitaimi e aofia ai Samoa ma isi atunuu o le Pasefika. 

O le visa o loo malaga mai ai i latou o lea ua see atu i le multi visa poo le multi entry i le faatagana e fitu masina, ina ia mafai ona fealua’i i se faalavelave e ono tula’i mai i totonu o le latou aiga i Samoa i le fitu masina, auā o le mea sa iai muamua afai ae malaga mai le tagata i galuega ae toe foi i Samoa i se faalavelave e toe apalai le isi visa e toe sau ai. 

O le isi suiga fou, afai ae malaga mai i galuega faavaitaimi, e maua le avanoa e te auai i a’oa’oga e faalautele ai le malamalama auā le sa’ilia o nisi galuega i lalo o galuega faavaitaimi, o avanoa ia e fai i le taimi ua mae’a ai galuega. 

O le feoa’iga o tagata faigaluega o lea ua oo atu i le 21 i le 24 aso e tatau ona iai faato’ā mafai lea ona feoa’i teams. 

O le mafuaaga o lea faafitauli, ona e iai nisi o tagata e malaga mai ae ua oo i le taimi e uma ai galuega, ona taumafai lea o kamupani ma le afioga ia Laufiso e tau fai se faiga e faauma lelei ai masina na malaga mai ai tatou tagata ae aua ne’i faaselemutua masina o galuega. 

E 30 itula lea ua tuuina mai e le malo mo tatou tagata faigaluega, ua mafai ai e kamupani ona faatapulaa le 30 itula lea le maualalo i le vaiaso mo le 4 vaiaso. 

O le tele o nei suiga ua aumai e le malo o Niu Sila, o loo fai lava mo latou kamupani iinei ina ia penifiti ai latou, ae ono taotaomia ai galuega mo a tatou tamafanau.