O le amataga o lenei vaiaso fou ua faagasolo ai le feiloaiga masani faapalemene a sui mamalu o le fono aoao faitulafono latou te muamua ona iloilo ma talanoaina ai mataupu i tulafono tau faaofi o le a tuuina atu i tauaofiaga i le Aso Lua le Aso 14 o Tesema.
E tasi le tulafono tau faaofi o le a soalaupule i le faatasiga lea a faipule, o le tulafono lea tau faaofi o teuteuga o le tulafono o lafoga o tupe maua 2021. O le Ofisa Sili o le Matagaluega o Tiute ma Tupe Maua le afioga Matafeo Avalisa Viali Fautualii o le a ia folasia lea teuteuga i luma o sui usufono mamalu o le Palemene lea o le a fesiligia ai foi i le mataupu e fia maua ai e faipule se silafia atili.
Ua iai le talitonuga o teuteuga ia o le a soloia ma toafia ai aiaiga sa iai muamua e pei ona sa pasia e le paeaiga talu ai, faasino i lafoga a faifeau tausi nuu. O le a faia le sauniga tatalo a le palemene i le itula e 5 i le vaveao o le Aso Lua a’o le’i tauaofia mo lana fonotaga masani ma o le fonotaga faaiu foi lea o lenei tausaga mo le paeaiga fou lona 17 a le Fono Aoao Faitulafono a Samoa ona faia ai lea o malologa masani mo le faaiuga o le tausaga a’o foufou mai galuega o le tausaga fou 2022.
