E ui o loo mafuli le lagolago i le polokalame o loo maua fua ai lunch a fanau aoga, ae lē o suia ai le faaiuga ua vaavaai iai le malo.

Lapataiga mai le minisita lagolago o aoga, David Seymour, e lē fesiligia le faaitiitia o tupe faaagaga mo le polokalame.

E tele itu lelei o loo fesoasoani ai le maua fua o meaai nei mo fanau, e pei o le o ai o fanau i le aoga i aso uma e tusa ma suesuega a tagata suesue o le iunivesite o Aukilani.

O le suesuega foi lava lea e tasi ua toe molimau ai i tala a le Newshub o loo fesoasoani foi i le maloloina o le mafaufau o le tamaititi.

E ui i nei suesuega ae ua fai mai le minisita lagolago, o le polokalame lenei o loo alu ai le lata i le $340 miliona ma o lea na gata le paketiina e le Labour poo le faigamalo faatoa uma atu i le faaiuga o le tausaga lenei, ma e lē mafai e le faigamalo fou ua iai nei ona faaauau, e lē o iai se tupe.

I lenei lava mataupu, e foliga mai i saunoaga a Seymour e lē o le polokalame atoa o le a motusia.