Ua talia le toe talosaga le failautusi o le vaega faaupufai e puipuia aia tatau o tagata le HRPP le afioga ia Lealailepule Rimoni Aiafi i le komisi o galuega a le faamasinoga, e lē tatau ona se’ei le afioga i le Faamasino Sili i le suesueina o le talosaga apili i le loia sili a le malo lea ua faatulaga e suesue i le faaiuga o lenei vaiaso.
O le afiafi o le Aso Tofi 15 o Iulai na fono ai sui o le komisi e iloilo lenei talosaga. O se isi lea o gaioiga a lea vaega faaupufai ua faamatalaina o se isi taumafaiga e toso ai le taimi a’o tatali le atunuu poo afea e maua ai se to’a o le lē mautonu ua aafia ai upufai o malo ona o le faaiuga o le palota ia Aperila.
Ua faailoa e Lealailepule i luga o le leitio faavaomalo a Niu Sila e le’i faamalieina o ia i le tali atu a le Komisi o galuega a le faamasinoga i le faaseā muamua na ave iai, le faaseā lea na iloiloina i le Aso Lua.
O le mafuaaga lea o le toe tuuina atu o le talosaga i le taofia ai o le faamasino sili mai lona tauaveina o suesuega o le apili lea o loo seei faatasi ai ma tamaitai faamasino e to’alua o le faamasinoga maualuga.
E le’o iai se faatuatuaga atoatoa a Lealailepule ma le vaega a le HRPP i le afioga i le Faamasino Sili e mafua mai i faaiuga o nisi o mataupu faatatau i le faigapalota ua maea lona suesueina ma faia iai faaiuga.
O tulaga masani talosaga e faasee ese se faamasino mai le suesuega o se mataupu e tuuina atu le talosaga i le faamasinoga ma iloilo ai ma faia iai le faaiuga, peitai o le matauatu iai ua lē o le tulaga lea ua faaauala atu ai nei se manaoga faapea ona o lea ua oo i le komisi o galuega a le faamasinoga.
O le Aso Tofi na toe tau aofia ai le faamasinoga o talosaga toe iloilo poo le talosaga apili e faamautū nisi o tapenaga a’o lumanai le latou suesuega i le apili o le loia sili a le Malo e faasino i le faaiuga na poloaina ai le usuia o le palemene i totonu o le 7 aso lea na maea i le Aso Gafua ua mavae.
O lea tauaofiaga na faailoa ai le talosaga a le vaega faaupufai a le HRPP e fia auai o se itu auai o suesuega o lenei talosaga apili. Faalia e le Faamasino Sili ia Satiu Simativa Perese i lea tauaofiaga e ui lea faatoa oo atu le talosaga a le HRPP i le Aso Lulu o le vaiaso nei peitai o lea ua talia e le faamasinoga e auai i suesuega.
O le faamasinoga o talosaga apili a le atunuu le faamasinoga maualuga o le Peresetene o le afioga i le Faamasino Sili o ia foi e tauaveina suesuega o se mataupu faatasi ai ma nisi o faamasino a le faamasinoga.
