O le aso lenei Aso Faraile 26 o Novema lea ua faatautaia ai loa palota laiti mo itumalo e 6 lea o loo tau sailia o latou sui faipule mo le Palemene o Samoa.
O se aso ua leva ona tapena ai le Ofisa o le Faigapalota faapea i latou o galulue mo le faatinoina o palota laiti ae le gata i lea o sui tauva lea o loo autu iai le asō ma lona faamoemoe.
E pei ona silafia o itumalo e 6 lea o loo faatautaia i le vaiaso nei a latou palota laiti e aofia ai Sagaga No.2, Sagaga No.4, Falealili No.2, Aana Alofi No.2, Safata No.2 ma Aleipata Itupa i Lalo. E to’a 19 sui tauva o le a tamomoe i le faiga palota laititi e saili ai sui taitasi mai nei itumalo e fai ma sui o le Palemene lona 17 o Samoa.
E i lalo ifo o le to’a 16,000 le aofai o i latou o le a fai a latou palota i lea faamoemoe tele a le atunuu ma o le itula e 8 i le taeao nei na amata tatala ai fale palota aua le faataunuuina o palota a tagata o ia itumalo.
