A o iai i Samoa le Minisita o mataupu tau i le atina’e o le Malo o Ausetalia ia Pat Conroy, o le Aso Lulu o le vaiaso nei na faatino ai se sainigalima a le alii Minisita ma le tamaitai Minisita o Tupe le afioga Mulipola Anarosa Ale-Molioo, e faamautu ai le lagolago a Ausetalia i fuafuaga tau tala o le tupe a le Malo o Samoa mo ana galuega faatino o le atina’e o le tamaoaiga.
E 20 miliona tala Ausetalia poo le 36 miliona tala Samoa ua faamautu i lea lagolago i le faamoemoe o se tasi o galuega tāua o le a faatupe ai, o le toe faaleleia lea o vaega eseese o le tamaoaiga o le tatou atunuu na matuā olopala ma palailai i aafiaga o le faamai Koviti-19.
O le Aso Lulu foi na feiloai atu ai le alii Minisita i le tamaitai Palemia le afioga Fiame Naomi Mataafa, ma faaalia ai e Pat Conroy le agaga faafetai o lona Malo i le mausali pea o sootaga vavalalata o Malo e lua, auā o Samoa o se tasi o Malo o le Pasefika o loo tu malosi i le siitia o faiga faapaaga ma Ausetalia i le silasila mamao e fausia pulega malo lelei.
Sa asia e le alii Minisita le nofoaga tutotonu o galuega e fesoasoani ai i se fofo i suiga tetele o le tau lea o loo i le nofoaga tutotonu o le faalapotopotoga o le siosiomaga o le Pasefika le SPREP o loo i Vailima.
O se tasi lea o lagolago a le Malo o Ausetalia i atunuu o le Pasefika e pei o Samoa o polokalame e tali atu ai i suiga o le tau, e pei ona aofia i se maliega faavaomalo na sainia e le Palemia o Ausetalia ma le Palemia o Samoa i le masina na tea nei, a o iai le taitai o le tatou Malo i lana uluai asiasiga taualoa i se valaau faaaloalo a le Malo o Ausetalia.
